📝 എഴുത്തു പെട്ടി

ബസ് സ്റ്റാൻഡിലെ
ആൽമരച്ചോട്ടിലായിരുന്നു
ആശനിരാശകളുടെ ലോകത്തേക്ക്
തുറന്നു വച്ച കിളിവാതിലുമായി
നീ നിന്നിരുന്നത്.

ഞങ്ങളുടെ കിനാവുകളും
വേദനകളും നീ മടികൂടാതെ
ഉദരത്തിൽ പേറിയിരുന്നു

വിരഹനിശ്വാസത്താൽ
കുതിർന്ന കുറിമാനങ്ങളും
വേർപാടിൻ നൊമ്പര ദൂതുകളും
നിന്നെ എത്ര പൊള്ളിച്ചിരിക്കും

പ്രണയാക്ഷരങ്ങളുടെ മഴപ്പെയ്ത്ത്
ചുവപ്പുടുത്ത നിന്നെ ഉന്മാദിയാക്കിയിരിക്കും

നോവിന്റെ മൂശയിൽ മെനഞ്ഞെടുത്ത
സൃഷ്ടികൾ വെളിച്ചം തേടി
നിന്നെ വീർപ്പുമുട്ടിച്ചിരിക്കും

കാത്തിരിപ്പിനൊടുവിൽ എത്തുന്ന
നിയമന കുറിപ്പുകൾ
നിന്നെ കോരിത്തരിപ്പിച്ചിരിക്കും

ഹൃദയത്തുടിപ്പും ചുടുചുംബനങ്ങളും
കിനാക്കളും കണ്ണീരും
മുദ്ര ചാർത്തി കൈമാറിയ നീയിന്ന്
മറുകുറിയില്ലാത്ത പ്രണയങ്ങളുടെ
നിരാശകളുടെ ചിതലരിച്ച
ആത്മാക്കളെ നെഞ്ചിലേറ്റി
കിഴവനാലിന്റെ ചോട്ടിൽ
കാലത്തിന്റെ മൂകസാക്ഷിയായി
കാറ്റേറ്റ്... വെയിലേറ്റ്... ഏകനായി...